Mkapa: Benki ya Dunia ilibariki City Water kutimuliwa
Asema mikataba Tanesco na ATC haikuwa na tathmini halisi
Na Omari Shaaban, Arumeru
RAIS mstaafu wa awamu ya tatu, Benjamin Mkapa amesema Benki ya Dunia iliridhia uamuzi wa serikali kuvunja mkataba na kampuni ya City Water.
Ameeleza kuwa serikali ya awamu ya tatu ilivunja mkataba na City Water, baada ya kampuni hiyo kushindwa kutekeleza makubaliano iliyowekeana na serikali ya kuboresha upatikanaji wa maji katika jiji la Dar es Salaam.
Rais mstaafu amefafanua kwamba wafadhili, ikiwemo Benki ya Dunia, waliokuwa wakiipatia fedha serikali katika kuboresha upatikanaji wa maji katika jiji la Dar es Salaam, waligoma kuchangia baada ya kuona City Water haitekelezi makubaliano yake na serikali.
Aliyasema hayo jana wakati akiwasilisha mada kuhusu ubinafsishaji na ujirani mwema, kwenye mkutano mkuu wa 17, wa Kanisa la Kiinjili la Kilutheri Tanzania (KKKT), katika ukumbi wa Chuo Kikuu Kishiriki cha Tumaini, Makumira, wilayani Arumeru.
Akifafanua zaidi kuhusu City Water, kutokana na maswali ya wajumbe wa mkutano huo, Mkapa alisema kuwa baada ya kugundulika kwamba kampuni hiyo inakwenda kinyume na utaratibu, ilibidi Waziri wa Maji na Maendeleo ya Mifugo wakati huo, Edward Lowassa, kuingilia kati na kuzungumza nao.
Mkapa alisema kuwa licha ya kueleweshwa zaidi na zaidi na Waziri Lowassa, ilionekana hakukuwa na maelewano mazuri na kilichofanyika ni kuvunja mkataba.
"Na kweli baada ya kuvunja mkataba huo, na kuwaarifu wafadhili pamoja na Benki ya Dunia, fedha zikaanza kuingia tena kwa ajili ya kuendelea na utaratibu huo," alisema Rais mstaafu.
Akizungumzia mashirika mengine kama Shirika la Ndege Tanzania (ATC) na Tanesco, Mkapa alisema serikali iliingia mikataba bila kuwa na tathmini halisi ya faida ambayo ingepata kwenye mashirika hayo.
Alisema kuwa anaungana na serikali ya awamu ya nne katika kuhakikisha mikataba mbalimbali ambayo serikali iliingia, iwe ya mafanikio na si ya ubabaishaji.
Kuhusu sera ya ubinafsishaji, alikumbusha kwamba lengo ni kupunguza mzigo wa serikali kuhimili shughuli za mashirika ya umma ambayo aghalabu huendeshwa kwa hasara.
"Ubinafsishaji si itikadi ya kisiasa.ndani ya nchi yetu sijasikia chama chochote cha upinzani kwa CCM, kikipinga ubinafsishaji kisiasa.ni kwamba wanaeleza tuhuma zao na kutoridhishwa kwao kwa taratibu za ubinafsishaji, lakini hoja za ubinafsishaji ni nzito na hazipingiki," alisema Mkapa.
Akizungumzia taasisi za kidini, alitaka ziwe vielelezo tosha vya umoja na uadilifu na ziwe mfano wa mema kwa jamii, ili kuendeleza amani na upendo katika jamii ya Tanzania.
Katika miaka kumi ya uongozi wake, alisema, KKKT iliunga mkono juhudi za serikali za kuboresha maisha ya Watanzania na kuimarisha umoja na amani ya nchi.
Rais Mkapa aliwataka wajumbe wa mkutano mkuu huo kuhakikisha wanaendeleza utaratibu wa kuchagua viongozi ambao watawaongoza kwa amani na upendo na kuliimarisha zaidi kanisa hilo.